ಹೇ ....ಅನಾಮಿಕ ಬಂಧು !!!

ಕೆಲ ದಿನಗಳ ಹಿಂದೆ ವಿಕ ಭಟ್ಟರ ಪುಸ್ತಕ ಬಿಡುಗಡೆಗೆ ಬಂದಿದ್ದ ನಿನ್ನಿಂದಲೇ ಜಯಂತ್ 'ಅನಾಮಿಕರಾಗಿ ಅಂತರ್ಜಾಲದಲ್ಲಿ ಕಾಮೆಂಟ್ ಮಾಡುವರೆಲ್ಲ ಹೇಡಿಗಳು' ಅಂತಾ ಹೇಳಿಕೆ ಕೊಟ್ಟರು! ಇದರ ನಂತರ ಅವರ ಹೇಳಿಕೆಯ ಪರ-ವಿರೋಧ ಬಹಳೇ ಗಮ್ಮತ್ತಿನ ವಾದ-ವಿವಾದಗಳಾದವು. ಅದರ ನಂತರ ನಮ್ಮ ಪ್ರೀತಿಯ ಹುಡುಗಿ ನಾಗ್ತಿ 'ಬ್ಲಾಗಿಗಳಿಗೆ, ಕಮೆಂಟುದಾರರಿಗೆ ಕಡಿವಾಣ ಹಾಕುವ ಅಗತ್ಯವಿದೆ' ಎಂದು ಫರ್ಮಾನು ಹೊರಡಿಸಿದರು. ಹಾಗಾದರೆ, ಈ "ಅನಾಮಿಕ" ಸಣ್ಣವರಿಂದ ಹಿಡಿದು ಸಾಹಿತ್ಯ ಲೋಕದಲ್ಲಿ/ ಪತ್ರಿಕಾ ರಂಗದಲ್ಲಿ ಹೆಸರು ಮಾಡಿರುವವರನ್ನೂ ಬಿಡದೆ ಕಾಡುತ್ತಿದ್ದಾನೆ ಎಂದಾಯಿತು!

ಯಾರು ಈ ಅನಾಮಿಕ? ( 'ಅನಾಮಿಕ' ಎಂಬ ಶಬ್ದದ ಕಾಪಿರೈಟ್ ಶ್ರೀ ರಾಜೇಶ್ ಹೆಗಡೆಯವರಿಗೆ ಸಲ್ಲಬೇಕು. ಉಳಿದೆಲ್ಲ ಕನ್ನಡ ಅಂತರ್ಜಾಲ ತಾಣಗಳು guest , unknown, anonymous ಇತ್ಯಾದಿ ಪದ ಬಳಕೆ ಮಾಡುತ್ತಿವೆ) ಬರಿ ಹೆಸರಿಲ್ಲದವನೇ? ಅಥವಾ ಬೇರೆ ಹೆಸರಲ್ಲಿ ಬರೆಯುವವನೇ? ಬೇರೆ ಹೆಸರಲ್ಲಿ ಬರೆಯುವವನು ಹೇಗೆ ಅನಾಮಿಕನಾಗುತ್ತಾನೆ? ಅನಾಮಿಕ ಎಂಬ ಹೆಸರಿರುವವರೇ ಎಷ್ಟೋ ಇದ್ದಾರಲ್ಲ?( ಹೆಚ್ಚಾಗಿ ಹೆಣ್ಣುಮಕ್ಕಳು). ಅಷ್ಟೇ ಏಕೆ, ಕಾವ್ಯನಾಮಗಳೂ ಅನಾಮಿಕತೆಯ ಇನ್ನೊದು ರೂಪ ಅನ್ನಬಹುದೇ? ( ಜೋಗಿ, ಆನಂದ ಕಾವ್ಯ, ಕಾಮರೂಪಿ...). ನಾನೇ 'ಕೆಎಲ್ಕೆ' ಎಂಬ ಹೆಸರಿನಡಿ ಹೋಗಿ ಯಾವುದೋ ಅಂತರ್ಜಾಲದಲ್ಲಿ ಪ್ರತಿಕ್ರಿಯೆ ಬರೆದರೆ ಅಲ್ಲಿ ಅನಾಮಿಕನಾಗುತ್ತೇನೆಯೆ? ಅಥವಾ ನಾಮಿಕ(ನಾಮವುಳ್ಳ)ಅನಾಮಿಕ ಎಂದಾಗಬಹುದೇ? ಹೀಗೆ ಹತ್ತು ಹಲವು ಉತ್ತರಿಸಲಾಗದ ಪ್ರಶ್ನೆಗಳು...

ಈ ಅನಾಮಿಕ ಚರ್ಚೆಯ ಸಂಧರ್ಭದಲ್ಲಿ ನನ್ನ ಮಿತ್ರನೊಬ್ಬ ಹೇಳುತ್ತಿದ್ದ; ( ಆತನಿನ್ನು ಅನಾಮಿಕನಾಗಿ ಹೋಗಿ ಎಲ್ಲೆಲ್ಲಿ ಎಷ್ಟು ತೊಂದರೆ(?) ಕೊಡುತ್ತಾನೋ ಏನೋ!!) ಲಂಕೇಶ್ ಸುಮಾರು ಹದಿನಾರು ವರ್ಷ 'ನೀಲು' ಎಂಬ ಹೆಸರಲ್ಲಿ ಬರೆದರು. ನೀಲು ಎನ್ನುವವಳು ಹದಿನಾರರ ಹುಡುಗಿ ಎಂದುಕೊಂಡು ಓದುತ್ತಿದ್ದ ನಾವೆಲ್ಲಾ ಹದಿನಾರು ವರ್ಷ ಕಳೆದರೂ ಆಕೆ ಶೋಡಷಿಯೇ ಎಂದು ಕಲ್ಪಿಸಿದ್ದು ಸಾಹಿತ್ಯದ ಸಾಮರ್ಥ್ಯವೇ ಯಾ ಅನಾಮಿಕತೆಯ ಜಾದುವೆ? ಹೀಗೆ, ನೀಲುವನ್ನು, ಜಾನಕಿಯನ್ನು, ಸಿರಿಯನ್ನು ಒಪ್ಪಿಕೊಂಡ ನಾವು ಸಮಾಜಮುಖಿ, ಗಂಧ, ಕೊಂಕುಭಟ್ಟ, ಪೂನಾವಾಲರನ್ನು ಏಕೆ ಒಪ್ಪಿಕೊಳ್ಳುವುದಿಲ್ಲ? ( ಅವರೆಲ್ಲ ಇಲ್ಲೇ ವಿಸ್ಮಯದಲ್ಲಿ ಸದಾ ಓಡಾಡಿಕೊಂಡು, ಬೆರೆ ಬೆರೆ ಹೆಸರಲ್ಲಿ ಲೆಖನ ಬರೆಯುತ್ತಲಿರುವ ಪ್ರಜೆಗಳೇ ಇರಬಹುದೆಂಬ ಊಹೆ ಇದ್ದರೂ ಸಹ)

ನಮಗೆಲ್ಲ ಭಯವೇ? ನಾವು ಏನೇ ಬರೆದರೂ ಯಾವ್ಯಾವುದೋ ರೂಪದಲ್ಲಿ ಬಂದು ಏನೇನಾದರೂ ಝಾಡಿಸಿಯಾರೆಂಬ ಅಳುಕೇ? ಹಾಗಾದರೆ ನಮ್ಮ ಬರವಣಿಗೆಯಲ್ಲಿ ನಮಗೇ ವಿಶ್ವಾಸ ಇಲ್ಲವೆಂದಾಯಿತಲ್ಲವೇ? ಇತ್ತೀಚಿಗೆ ಅಂತರ್ಜಾಲದಲ್ಲಿ ಒಂದು ಟ್ರೆಂಡ್ ಶುರುವಾಗಿದೆ. ಪತ್ರಿಕೆಗಳಲ್ಲಿ ಬರುವ ಸುದ್ದಿಗಳು, ಅವುಗಳಲ್ಲಿಯ ತಪ್ಪುಗಳು, ಹೆಸರಾಂತ ಲೇಖಕರು ಬರೆಯುವ
(ಉದಾ- ವಿಕ ಭಟ್, ಪ್ರತಾಪ್ ಸಿಂಹ, ರವಿ ಬೆಳಗೆರೆ, ಮಣಿಕಾಂತ್ ಇತ್ಯಾದಿ) ಬರಹಗಳ ಮೂಲ ಹಾಗೂ ಸ್ಪೂರ್ತಿ ಯನ್ನು ಹುಡುಕಿತಂದು ಅಂತರ್ಜಾಲದಲ್ಲಿ ಹರಡಿಬಿಡುವುದು! ಇದನ್ನು ಮಾಡುವವರು ಮತ್ಯಾರೂ ಅಲ್ಲ ;ನಮ್ಮ ಅನಾಮಿಕ ಬಂಧುಗಳೇ! ಇದು ನಮ್ಮ ಬರಹಗಾರರ ತಲೆ ಕೆಡಿಸುತ್ತಿರಬಹುದೇ? ಒಟ್ಟಿನಲ್ಲಿ, 'ಹಂದಿ ಇದ್ದರೆ ಹೇಗೆ ಕೇರಿ ಶುದ್ಧವೋ ಹಂಗೆ' ಎಂಬ ದಾಸರ ಪದ ನೆನಪಿಸಿಕೊಳ್ಳುತ್ತಾ ಅನಾಮಿಕರಿರಬೇಕು ಎಂದು ನಾವು ಸಮಾಧಾನ ಪಟ್ಟುಕೊಳ್ಳುವದು ನಿಜವಾದ ಅನಾಮಿಕ ಕಾಳಜಿಗೋ ಅಥವಾ ಅನಾಮಿಕರನ್ನು ಹಂದಿಗೆ ಹೋಲಿಸಿ ಸೇಡು ತೀರಿಸಿ ಕೊಳ್ಳುವ ಪರಿಯೋ?

ಏನೇ ಹೇಳಿ, ಈ ಅನಾಮಿಕರ ಕಾಟ ತಪ್ಪದ ಅಂತರ್ಜಾಲ ತಾಣವೇ ಇಲ್ಲ. ದಟ್ಸ್ ಕನ್ನಡವಂತೂ 'ಕಾಮೆಂಟುದಾರರಿಗೆ ಸೂಚನೆ' ನೀಡುತ್ತಲೇ ಇರುತ್ತದೆ. ಕೆಂಡಸಂಪಿಗೆ, ಅವಧಿಗಳಲ್ಲಿ ಕಾಮೆಂಟುಗಳು moderator ಗಳ ಕೃಪಾ ಕಟಾಕ್ಷಕ್ಕೆ ಒಳಗಾಗಲೇ ಬೇಕು. ವಿಸ್ಮಯದಲ್ಲಿ ಈ ಅನಾಮಿಕರ ಬಗ್ಗೆ ನಡೆದ ಚರ್ಚೆಗಳು ನಿಮಗೆ ಗೊತ್ತೇ ಇದೆ. ಪ್ರಜೆಗಳಿಗಿಂತ ಇಲ್ಲಿ ಅನಾಮಿಕರು ಹೆಚ್ಚು ಖ್ಯಾತಿ-ಕುಖ್ಯಾತಿ ಎರಡೂ ಪಡೆದಿದ್ದಾರೆ. ಏನೇ ಆದರೂ ಅಂತರ್ಜಾಲಕ್ಕೆ ಅನಾಮಿಕರು ಅನಿವಾರ್ಯ. ಅವರನ್ನು ಹತ್ತಿಕ್ಕಿದರೆ ಅಭಿವ್ಯಕ್ತಿ ಸ್ವಾತಂತ್ರ್ಯಕ್ಕೆ ಧಕ್ಕೆಯಾಗುತ್ತದೆ, ಅನಾಮಿಕ ವ್ಯಕ್ತಿತ್ವದ ಅಸ್ತಿತ್ವವನ್ನೇ ಪ್ರಶ್ನಿಸಿದಂತಾಗುತ್ತದೆ, ಕೇರಿ ಕೊಳೆಯಾಗಿಯೇ ಉಳಿಯುತ್ತದೆ. ಸಾಲದೆಂಬಂತೆ 'ಯಾರಿರಬಹುದು ಈ ಅನಾಮಿಕ?' ಎಂಬ ಲೆಖಕನ ಊಹಾ ಶಕ್ತಿಗೆ ಕೆಲಸವಿಲ್ಲದಂತಾಗುತ್ತದೆ. icing on the cake ಅದು ಅಂತರ್ಜಾಲ ತಾಣದ ಬೆಳವಣಿಗೆಗೆ ಮುಳುವಾಗುತ್ತದೆ. ಈ ಅನಿವಾರ್ಯತೆಯ ಲಾಭ ಪಡೆದು ಅನೇಕ 'ವಿಕೃತಾಮಿಕರು' ( ಪತ್ರಿಕಾ ಸಾಹಿತ್ಯದ ಪ್ರಕಾರ 'ದುಷ್ಕರ್ಮಿಗಳು'!) ಸಾಧ್ಯವಾದಷ್ಟು ತೊಂದರೆ ನೀಡುತ್ತಾರೆ, ಮೋಜು ಪಡುತ್ತಾರೆ. ಇದು ಅನವರತ.

ಆದರೆ ವಿಧಿಯಿಲ್ಲ- "ಕಳೆಯಿಲ್ಲದೆ ಬೆಳೆಯಿಲ್ಲ; ಅನಾಮಿಕರಿಲ್ಲದೆ ಅಂತರ್ಜಾಲವಿಲ್ಲ!"